Pamja e oqeanit është e mirë për shpirtin, thotë një studim i ri. Hulumtuesit i krahasuan njerëzit që jetonin në zona të ndryshme të Wellingtonit në Zelandë të Re, dhe zbuluan se ata që kishin pamje në det çdo ditë kishin nivele më të ulëta të stresit, transmeton koha.net.
Kjo lidhje kishte mbetur edhe pasi që pasuria, mosha, gjinia dhe faktorët e tjerë të banorëve ishin marrë në konsideratë. Megjithatë, shikimi i hapësirave të gjelbra – si parqet dhe pyjet me bar – si duket nuk e sjellin të njëjtën dobi, sipas studimit të publikuar në numrin e majit të revistës “Health & Place”.
Kjo mund të jetë për shkak të faktit se studiuesit nuk kishin bërë dallim në mes të llojeve të hapësirave të gjelbra, tha bashkautorja e studimit Amber Pearson, asistente profesoreshë e gjeografisë shëndetësore në Universitetin Shtetëror të Michiganit.
“Kjo mund të jetë për shkak se hapësirat e kaltra ishin të gjitha natyrale, ndërsa hapësira e gjelbër përfshiu zona të krijuara prej njeriut, si fushat sportive dhe terrenet sportive, si dhe zonat natyrore si pyjet native”, tha ajo në një deklaratë për shtyp të universitetit.
“Ndoshta, nëse i shikojmë vetëm pyjet native mund të gjejmë diçka të ndryshme,” shtoi Pearson.
Gjetjet mund të rezultojnë të dobishme për planifikuesit e qyteteve. Për shembull, planifikimi i ndërtimit të një numri të caktuar të ndërtesave të larta ose shtëpive të përballueshme në qytetet bregdetare me pamje nga oqeani mund të përmirësojë shëndetin mendor, thanë studiuesit.
Hulumtimet e mëtejshme mund të përcaktojnë nëse shikimet në sipërfaqe të mëdha të ujit, si liqenet e mëdha, e kanë të njëjtin efekt si shikimet në oqean, tha Pearson, përgatiti Koha. (b.an)
