Presidenti Ilir Meta thotë se Shqipëria zë vendin e parë në Europë për numrin e azilantëve ekonomike. Përmes një postimi në Facebook, ai thotë se këto të dhëna janë nga Eurostat, ku Shqipëria lë pas dhe vende të sapodala nga lufta dhe konfliktet civile.
Sipas kreut të shtetit, lufta kundër varfërisë, hapja e vendeve të reja të punës e anulimi i koncesioneve korruptive ndalojnë shpopullimin e vendit.
Postimi i plotë i Presidentit:
Shqipëria zë vendin e parë në Europë për numrin e azilantëve ekonomikë, duke lënë pas edhe vende të sapodala nga lufta dhe konfliktet civile. Një shqiptar ndihet sot më i pashpresë se një sirian, iraken dhe afgan. Lufta efikase kundër varfërisë, zhdukja e monopoleve, anulimi i koncensioneve korruptive, rritja e prekshme e pagave dhe pensioneve, hapja e vendeve të reja të punës, ulja e taksave, krijimi i shanseve dhe i mundësive të reja për të rinjtë e ndalojnë shpopullimin. KOHA PËR TË MENDUAR DHE VEPRUAR PËR SHQIPTARËT!
