Shumë vende europiane shënuan këtë të enjte shifrat më të larta të infektimit nga COVID-19, që prej heqjes së masave bllokuese kundër përhapjes së virusit.
Gjermania shënoi rekord prej 1707 infektimesh, shifra më e lartë prej 26 Prillit. Autoritetet thanë se rritja lidhet me numrin e lartë të personave që kthehen nga jashtë, e po ashtu edhe me mungesën e higjienës e distancimit social.
Franca dhe Spanja shënuan po ashtu mbi 3700 raste të reja infektimesh në 24 orët e fundit. Situata është më e rëndë në Spanjë ku u shënuan edhe 127 vdekje. Mediat vendase shkruajnë se shumica e të infektuarve kanë qenë në azilet e pleqve.
Shifër të lartë krahasuar me ditët e fundit shënoi edhe Italia, ku u shënuan 642 raste të reja.
Rekord infektimesh ditore me rreth 70 mijë raste të reja shënoi edhe India, shifër që vetëm Shtetet e Bashkuara e kanë arritur deri më sot. I gjithë globi sot numëron mbi 22.6 milionë të prekur, mes të cilëve afro 792 mijë kanë humbur jetën nga COVID-19.
/a.r
