Ish-sulmuesi i Dinamos së Kievit, Milanit dhe Chelseat, aktualisht zëvendëstrajner i Ukrainës, legjenda Andriy Shevchenko, në përfundim të miqësores me Shqipërinë theksoi se Kombëtarja kuqezi ka ndryshuar shumë vitet e fundit dhe mund t’u hapë probleme edhe skuadrave më të forta.
“Shqipëria ka ndryshuar shumë, skuadra ka bërë progres. Trajneri De Biasi po punon shumë mirë, futbollistët gjithashtu. Ndeshja ishte shumë e ekuilibruar dhe e fortë, ne ishim më pranë fitores dhe ia arritëm. Unë e uroj Shqipërinë që të ecë sa më shumë në Evropian.”
Fitues i “Topit të Artë”, e pranon se Shqipëria është një Kombëtare për t’u vlerësuar, pasi ka lojtarë të rëndësishëm që vlerësohen në futbollin ndërkombëtar.
“Shqipëria është një realitet në futbollin evropian dhe kjo kuptohet edhe nga emrat e futbollistëve që luajnë në kampionatet të rëndësishme në Evropë. Janë vërtet lojtarë shumë të mirë. Do të doja të shtoja diçka tjetër. Jam pritur shumë mirë këtu nga tifozët shqiptarë dhe për këtë gjest dua t’i falënderoj dhe t’u them që do të mbështes Shqipërinë në “Francë 2016”, u shpreh Shevchenko për Supersport. (bw / r.a)
