Goditet një rasti i vjedhjes së makinave, duke vënë në pranga dy persona në Tiranë. Operacioni i kryer nga efektivët e komisariatit nr.3 është koduar “Shëtitësit e natës”, ku gjatë tij janë arrestuar dy persona në tentativë për të vjedhur një makinë.
Gjithashtu është zbardhur dhe dokumentuar një vjedhje e ndodhur më herët, e kryer nga dy të dyshuarit.
Pas kallëzimit të bërë nga pronari i makinës dhe mbi bazën e informacioneve të grumbulluara, efektivët e policisë kanë organizuar operacionin dhe kanë bërë arrestimin në flagrancë, në tentativë për të vjedhur automjetin në pronësi të shtetasit E. S., në rrugën “Mujo Ulqinaku”.
Kështu u vunë në pranga V. K., 31 vjeç dhe E. H., 32 vjeç, i dënuar më parë për vjedhje, të dy banues në Tiranë.
Në bazë të hetimeve dhe të provave materiale, pamjeve filmike dhe dëshmi, rezulton se dy të rinjtë janë autorë të vjedhjes së një automjeti, në muajin shtator, në rrugën “Bogdanët”.
Aktualisht vijon puna për zbardhjen e vjedhjeve të tjera, të cilat dyshohet se janë kryer nga të dyshuarit, ndërkohë që materialet iu referuan Prokurorisë për ndjekje të mëtejshme.
g.kosovari
