Një person ka mbetur i plagosur rëndë pas një sherri për një vajzë në një lokal në Zall- Herr, ndërsa policia arrestoi dy vëllezër si autorë të dyshuar të krimit.
Konflikti ka ndodhur pasditen e së mërkurës në Zall Herr, mes dy 24-vjeçarëve Albiond Kaca dhe Jetmir Marku, të dy banues në Zall Herr.
I plagosur mbeti Jetmir Marku, i cili u godit me sende të forta nga Albiond Kaca dhe vëllai i tij, Flamur Kaca 32 vjeç.
I plagosuri Marku është dërguar në spitalin e traumës në kryeqytet, ku mësohet se ndodhet në gjendje të rëndë shëndetësore. Sipas të dhënave nga policia, ai ka marrë goditje në pjesën e pasme të kokës, çka i ka shkaktuar hematoma dhe hemorragji.
Si ndodhi sherri në lokal
Mësohet se incidenti ndodhi në kohën kur Jetmir Marku ka qenë në lokal, ndërsa Albiond Kaca ndodhej në një tavolinë tjetër me të fejuarën e tij. Në këtë kohë, Marku i cili ishte edhe në gjendje të dehur, ka debatuar me Kacën për faktin se ai shoqërohej me vajzën që ndodhej me të në tavolinë. Në grindje e sipër, Marku ka goditur Kacën ndërsa ai është kundërpërgjigjur. Në këtë moment Albiond Kacës i është bashkuar edhe i vëllai Flamuri. Të dy ata kanë goditur Jetmir Markun me grushte, duke e lënë të plagosur.
Pas plagosjes, efektivët e komisariatit nr. 5 arrestuan dy vëllezërit Kaca, nën akuzën e plagosjes së rëndë me dashje në bashkëpunim për motive të dobëta.
