Një lajm i gëzuar ka qenë edhe për kreun e PD-së, Lulzim Basha, shërimi i profesor Dhimitër Krajës. Lideri i demokratëve ka reaguar në rrjetet sociale, pasi profesori fitoi betejën me koronavirusin dhe la sot Spitalin Infektiv.
Përmes këtij mesazhi, Basha ka kërkuar gjithashtu transparencë nga qeveria.
“Prandaj, sa nuk është vonë, qeveria duhet të zbatojë korrektësisht kërkesën standarde të OBSH: rritjen e numrit të testimeve”, shkruan Basha.
POSTIMI I PLOTE
Është një lajm i gëzuar për mua personalisht dhe për çdo bashkëqytetar shërimi i prof. Dhimitër Krajës.
Mendimet dhe lutjet tona shkojnë për të gjithë personelin mjekësor që po përballet sot me COVID-19. Për të gjithë ata mjekë, laborantë, infermierë, sanitarë e shoferë ambulancash, që rrezikojnë çdo ditë jetët e tyre në shërbim të qytetarëve. Në këto ditë të vështira ata meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
Transparenca është garanci dhe siguri si për stafet mjekësore, ashtu dhe për të gjithë qytetarët. Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.
Prandaj, sa nuk është vonë, qeveria duhet të zbatojë korrektësisht kërkesën standarde të OBSH: rritjen e numrit të testimeve. Çdo shmangie nga kërkesat e përsëritura nga OBSH është papërgjegjshmëri e rëndë që jo vetëm fsheh të vërtetën, por kushton shtrenjtë: Sa më pak testime, aq më pak persona të identifikuar, aq më gjatë shumë zgjatet zinxhiri i infeksionit, aq më gjatë vazhdon karantina dhe thellohet kriza ekonomike.
Duhet vepruar sot, çdo ditë e humbur na kushton jetë dhe shëndet!
g.kosovari
