Nga Lorenc Vangjeli/ Jo vetëm negociatorët e marrëveshjes së detit.
Të paktën të ishin budallenj. Të ishin edhe paaftë, edhe të pazotë. Sepse budallallëku të paktën do të ngushëllonte shumicën dërmuese të shqiptarëve në këtë rast dhe do t’i bënte më me pak faj mbartësit e mëkatit të hershëm. Nuk është fjala këtu vetëm për grupin e hershëm negociator të marrëveshjes së detit me Greqinë. Por dhe për ata që vunë firmën në produktin “intelektual” të atyre ekspertëve shqiptarë që tkurrën kufinjtë e Jonit këtu e gjashtë vjet më parë. Domethënë, është fjala edhe për eprorët e tyre politikë dhe sërish jo vetëm ata. Duhet të shtohet në urimin për të qenë budallenj edhe valanga e gjerë gjithashtu e intelektualëve të tjerë me dhe pa kompas në dorë që nga pozitat e proqeveritarëve dhe modernëve kundër mbeturinave provinciale të patriotizmit, siç i konsideronin, luftonin me fjalë e pallë për të treguar sa korrekte ishte marrëveshja. Në përgjithësi janë një numër i madh personash dhe personazhesh, secili nga ta ende pa asnjë gjemb juridik në këmbë, që krijuan situatën absurde të ndarjes së padrejtë të detit. Që tani ju jep të drejtë në Athinë të kërkojnë atë që nuk jua ka marrë njeri. Që përsdërisin në greqisht: “Më jep atë që nuk ma ke”!
Me gjasë ministri i jashtëm grek nuk vjen në Tiranë këtë javë siç ishte planifikuar, në shenjë proteste për protestën zyrtare që Tirana bëri dy javë më parë për kërkimet ilegale të Greqisë për naftë në Jon. Edhe pse e dinë që marrëveshja e firmosur me buzëqeshje dhe lehtësinë e padurueshme të Lulzim Bashës atëherë me gjithë zonjën Bakojanis, nuk është në fuqi, ata sërish insistojnë në të njëjtën gjë. Edhe pse e dinë vendimin e gjykatës kushtetuese, me relator juristin edhe profesionist, edhe shqiptar të mirë, Xhezair Zaganjori, në Athinë vazhdojnë t’i referohen marrëveshjes së buzëqeshjes. Kjo është situata absurde e krijuar nga negociatorë e politikavë të dikurshëm. Ata, një tufë me budallenj në rastin më të mirë, hodhën një kompas në det dhe tani nuk ka perëndi që t’u nxjerrë grekëve qejfin e kërkimeve për naftë në të njëjtin det.
