Nga Ardit Rada
Pak orë pas publikimit të shifrave të luftës ndaj narkotikëve, që qeveria bëri në Pallatin e Kongreseve, ish-kreu i demokratëve postoi në Facebook disa fotografi të marra nga ajri.
Fotot në fjalë tregonin, sipas Berishës, plantacione droge në komunën Cudhi. Në postimin e tij, gjatë kohës që në Tiranë po zhvillohej seanca plenare e javës, ish-kryeministri ia faturonte informacionin atij që ai e quan prej pak kohësh ‘qytetari dixhital’.
Në fakt, bëhet fjalë për mesazhe të ardhura në Inbox, të cilat Berisha preferon t’i mbaje anonime. Denoncimet në fjalë, që nuk janë provuar kurrë nëse janë të vërteta apo sajesa të ish-kryeministrit, qëndrojnë përballë shifrave që zyrtarisht Guardia di Finanza ka publikuar sa i përket luftës ndaj drogës në Shqipëri.
Italia, që mbetet destinacioni i preferuar i trafikantëve, ka zhvilluar operacione të përbashkëta me Shqipërinë, ndërsa PD preferon të denoncojë raste përmes fotografive të marra në Google Earth që tregojnë sipërfaqe të gjelbërta, por që nuk duken se çfarë bimësh janë.
Po sot, kreu i demokratëve Basha (po përmes Facebook) ka akuzuar qeverinë duke thënë se italianët kapën plot 3500 kg hashash që shkonte nga Shqipëria në vendin fqinj. Por Italia shprehet zyrtarisht se bëhet fjalë për një sasi të kapur ndër vite, hetimet për të cilën kanë nisur që në vitin 2012. Kohë kjo, kur ministër i Brendshëm ishte Flamur Noka. Siç duket, kryeministri i qytetarëve dixhitalë duhet të gjejë ‘armë’ të tjera për të luftuar Guardia di Finanza-n.
