Deputeti i Partisë Demokratike, Gent Strazimiri, ka akuzuar kryeministrin Rama për një leje ndërtimi që sipas tij, është dhënë në Golem për të zëvendësuar ambientet sportive me një ndërtim.
“Ligji i Maliqit” për të pamundurit dhe privilegji e hatri për miqtë janë shfaqur së fundmi në formën më arrogante të mundshme në bregdetin e Golemit, ku Edi Rama ka dhënë leje për prishjen e ambienteve sportive e të përbashkëta për banorët, në resortin Laguna Blu, duke lejuar që aty të hedhë shtat një ndërtim skandaloz. Me firmën e Edi Ramës po grabitet një pasuri publike për t’u kthyer në biznes për klientelën e tij dhe për ata që kërkon t’i nënshtrojë”, është shprehur Strazimiri.
Partia Demokratike e dënon këtë akt të Ramës që Strazimiri e quan korruptiv dhe kërkon ndalimin e menjëhershëm të punimeve dhe kthimin në ligjshmëri.
“Me të njëjtin arbitraritet e paligjshmëri Kryeministri oksidental po zhduk një hapësirë sportive të përbashkët, për t’ia dhënë përsëri për ndërtim “Koçove” të tij, përsëri në breg të detit, në mënyrë që të fitoje një tjetër mjero mediatik, e kësisoj, më shumë propagande e përkrahje për një regjim që askush s’e do me. Ky regjim arbitrar, klientelist e me dy standarde i ka ditët e numëruara, dhe shpejt do të vijë koha e ballafaqimit me ligjin, për këtë dhe për të gjitha zullumet që ka bërë në këtë vend, sado të përpiqet të shtojë me mjerane të rinj, haremin e tij mediatik”, është shprehur Strazimiri.
SOT
