Të paktën 15 minatorë kanë ndërruar jetë pas shembjes së një dige në një minierë ari në rajonin e Siberisë të quajtur Krasnoyarsk Krai, në Rusi, ndërsa disa të tjerë rezultojnë të zhdukur. Sipas Autoritetit rus të Situatave Emergjente shkak për shembjen e digës janë bërë rreshjet e dendura të shiut që kanë përfshirë zonën gjatë ditëve të fundit.
Për pasojë uji dhe balta vërshtuan duke shkatërruar kazermat ku jetonin rreth 80 minatorë. Mbi 270 forca të ndihmës së emergjencave natyrore janë vënë në punë duke u përpjekur të gjejnë të zhdukurit apo të mbijetuarit.
Ministria e Shëndetësisë në Rusi, tha se 14 minatorë u dërguan në spital dhe tre të tjerë kanë pësuar lëndime.
Fatkeqësia e sotme është e pesta që mund të jetë shkaktuar nga shkelja e rregullave të sigurisë në minierat ruse, ku aksidentet për shkak të shembjeve dhe shpërthimeve në tunelet nëntokësore nuk janë të rralla. Ndërkaq, Komiteti Hetues i Rusisë, njofton se ka nisur hetimet për kanosje të rrezikut në minierën e arit.
