Deputeti i opozitës Dashamir Shehi, në një prononcim për TemA TV, deklaroi se nuk do ta votojë Reformën në Drejtësi nëse nuk do të ketë një vendim politik të opozitës. Megjithatë, kreu i LZHK-së, pjesë e grupit parlamentar të Partisë Demokratike, shprehet me bindje se në grupin e opozitës ka deputetë që janë dakord për ta votuar Reformën në Drejtësi edhe pa nenin 88, atë që po mban peng konsensusin.
“Nëqoftëse brenda PD dalin njerëz dhe individë që e votojnë atë, gjë që nuk e quaj të pamundur, unë për vete nuk e preferoj dhe nuk kam ndërmend ta bëj. Pse? Njëherë ne votojmë për solidaritet politik me njëri tjetrin. Jemi një vit përpara fushatës zgjedhore dhe do të shkojmë bashkë! Si të shkojmë ne kështu, copa copa e çika çika, sepse ne e dimë shumë mirë që ka shumë zgjidhje të tjera për ta mbyllur këtë reformë… Brenda PD-së ka shumë e shumë deputetë të cilët nuk janë kundër. Ka deputetë të cilët mund të votojnë dhe unë i respektoj në bindjen e tyre personale.”- tha Shehi.
Dashamir Shehi është kundër gjuhës së Bashkës kur fjala vjen tek “kërcënimi” I tij për të djegur mandatet e deputetëve, nëse do të ketë rrjedhje të votave të djathta.
“Unë nuk jam për atë, që thotë Basha, që mund tu djegë mandatet… këto janë budallallëqe. Mandatet nuk janë të zotit Basha dhe e dyta tu djegësh mandatet nuk është një sjellje demokratike, kjo hyn tek verifikimi e absolutizmi dhe e treta do ta këshilloja të mos përdorte më këtë lloj gjuhe sepse i ofendon bashkëudhëtarët politik me të cilët ka bërë shumë vite dhe do të bëjë shumë të tjera.”- theksoi Shehi.
Kryetari i LZHK flet me optimizëm se reforma në drejtësi do të marrë konsensusin e të gjitha palëve pasi ka një muaj kohë, por ai thekson se në këto negociata PD duhet të përfaqësohet me politikanë dhe jo me teknicienë, të cilët ai i quan:
“S’kanë asnjë peshë, janë disa djem të rinj që kanë lexuar nja 4 libra, që në darkë I thërresin ata djemtë e vjetër… nuk negociohet kështu.”
