Ish-komandanti i Brigadës së 37 të motorizuar të Ushtrisë së Jugosllavisë, Ljubisha Dikoviç, për merita në luftën e Kosovës, nga një epror i thjeshtë kishte arritur të bëhej shef i Shtabit të Ushtrisë së Serbisë. Pas luftës së Kosovës, përveç Dikoviçit, të graduar për merita lufte ishin edhe rreth 70 për qind e kuadrit ushtarak të Serbisë që kanë luftuar në Kosovë, të cilët ende janë pjesë e armatës serbe.
Në bazë të akuzave për vepra penale nga ana e Fondit për të Drejta Humanitare, prokuroria për krime lufte e Serbisë është duke e hetuar shefin e Shtabit të Ushtrisë së Serbisë, Ljubisha Dikoviç, për krime lufte dhe krime kundër njerëzimit në fshatin Rezallë të Kosovës, në vitin 1999.
