Gjatë ditës së sotme qarkulloi në media lajmi për dorëheqjen e 8 mjekëve të urgjencës në QSUT. Lidhur me këtë zhvillim pati reagime nga ministria dhe drejtoria e QSUT. Krerët e ministrisë u vunë në lëvizje dhe zhvilluan takim me mjekët e urgjencës.
Ndërkohë, lidhur me këtë lajm ka reaguar edhe vetë shefi i Shërbimit të Urgjencës Edmond Zaimi. Ky i fundit ka mohuar lajmin e dorëheqjes së mjekëve teksa ka shtuar se i gjithë stafi është në shërbim të qytetarëve. Ai ka deklaruar se gjithçka do të zgjidhet me drejtorinë e QSUT, me krerët e së cilës u zhvilua një takim.
“Nuk kemi dhënë dorëheqje, jemi në shërbim të qytetarëve. Çështja po zgjidhet me drejtorinë e QSUT”, ka deklaruar Edmond Zaimi, shefi i Shërbimit të Urgjencës.
Deklarata e shefit të Urgjencës:
“Situata është e ngarkuar me shuam të sëmurë nga e gjithë Shqipëria. I kalon kapacitetet e shërbimit tonë, me ngarkesë të madhe për personelin, ç’ka bën që edhe rreziku i gabimeve njerëzore të shtohet. Në këto kushte i gjithë stafi ka shkruar një peticion për drejtorin e Urgjencës, por akoma nuk është dorëzuar dhe nuk është bërë zyrtare.
Është një problem që ka ekzistuar, por është thelluar ditët e fundit duke bërë të pamundur vazhdimësinë e punës. Por janë problem që ne kërkojmë të zgjidhen mes njeri tjetrit duke sensibilizuar edhe opinionin për të shfrytëzuar shërbimin vetëm për shërbimet e urgjencës.
Ne nuk kemi dhënë dorëheqjen në 1997, absolutisht jo. Kjo është një kërkesë e jonë për të rregulluar problem, është puna e drejtorisë më tej për të zgjidhur problemet. Shërbimi është njëlloj sikur ka qenë më parë, por ngarkesa është tejet e madhe” tha ai.
/a.m.
