Shefi i Agjencisë Ndërkombëtare të Energjisë Bërthamore (ANEB), Yukiya Amano viziton Iranin për takime të nivelit të lartë, me qëllim të përshpejtimit të hetimeve të agjencisë për akuzat se Irani në të kaluarën kishte punuar për zhvillimin e armatimit atomik.
Një zëdhënës i ANEB-it tha se takimet e zotit Amano kanë për qëllim “qartësimin e çështjeve aktuale të mbetura”, të lidhura me hetimet e agjencisë. Diplomatët i kanë thënë agjencisë Associated Press se Amano e kishte planifikuar këtë udhëtim për intervista me shkencëtarët iranianë, të ndërlidhur me eksperimentet e dyshuara dhe për diskutim të inspektimit të planifikuar në kapacitetin bërthamor në Parchin të Iranit. Irani e ka hedhur poshtë çfarëdo pune për zhvillimin e armatimit atomik.
