Ish sulmuesi Alan Shearer ka thënë se “bota e futbollit po tallet me Anglinë” pas largimit të trainerit Sam Allardyce, 67 ditë pas emërimit në detyrë.
Allardyce dha dorëheqje nga detyra pas publikimit të lajmit ku ai shfrytëzoi pozitën e tij për të shprehur gatishmëri të ndihmojë një biznesmen nga Lindja e Mesme se si t’i shmanget rregullave të Federatës së Futbollit të Anglisë (FA) për transferimin e futbollistëve.
“Jam i hidhëruar, i pikëlluar, është një vlerësim i gabuar për një trajner i cili kishte thënë se posti i selektorit ishte puna që ëndërronte”, deklaroi ish kapiteni i Anglisë, Shearer për “BBC Radio 5 Live”, përcjell “Zëri.info”.
Allardyce është shprehur i dëshpëruar dhe ka kërkuar falje që e humbi postin. Allardyce e zëvendësoi Roy Hodgsonin pas “Euro 2016”.
Shearer, i cili shënoi 30 gola në 63 paraqitje për Anglinë shtoi: “Është një gabim i madh nga Sam dhe këshilltarët e tij. Nuk kam menduar se Anglia mund të bie më poshtë se ajo që ndodhi në Evropian. Tani jemi këtu, bota e futbollit qeshet me ne”. (b.an)
