SHÇBA arreston 2 policë në Fier, terrorizuan banorët duke gjuajtur me armë në ajër
SHÇBA arreston 2 policë në Fier, të dehur terrorizuan banorët duke gjuajtur me armë në ajër
Dy efektivë policie në gjendje të dehur kanë qëlluar disa herë në ajër duke terrorizua banorët në Fier dhe Divjakë, ndërsa udhëtonin me makinën e tyre. Dy punonjësit e policisë me gradën “Inspektor”, Edmond Sulaj, 43 vjeç, lindur dhe banues në Fier, dhe Amarildo Bala, 26 vjeç, lindur dhe banues në Fier, kanë pasur detyra si Patrullë e Përgjithshme në Komisariatin Policisë Fier. Sipas të dhënave, të dy këta punonjës policie, pasi kanë konsumuar një sasi të madhe alkooli në një nga lokalet e zonës turistike Divjakë, kanë qëlluar secili disa herë, me armët e tyre personale, në vend publik në rrugën automobilistike, brenda zonës turistike.
Më pas, ata janë larguar me mjetin tip BMW X5 me targa AA 220 DE, në drejtim të qytetit të Fierit. Pas njoftimit të marrë, shërbimet e policisë, kanë ngritur postblloqet dhe kanë ndaluar mjetin në vendin e quajtur “Rreth rrotullimi i Plugut”. Dy punonjësit e policisë fillimisht nuk i janë bindur urdhrit të shërbimeve të rendit për t’u shoqëruar, deri në ndërhyrjen e Shefit të Komisariatit të Policisë Lushnje.
