Edhe Shtetet e Bashkuara të Amerikës kanë vlerësuar negativisht zgjedhjet parlamentare në Rusi. Departamenti i Shtetit thotë se përdorimi i ligjeve nga qeveria ruse për “organizatat ekstremiste”, “agjentët e huaj” dhe “organizatat e padëshirueshme” kufizuan ashpër pluralizmin politik dhe penguan popullin rus nga ushtrimi i të drejtave të tij civile dhe politike”.

SHBA thotë se kufizimet e qeverisë ruse, të cilat u paraprinë nga përpjekjet e gjera për të margjinalizuar figurat e pavarura politike, gjithashtu penguan Zyrën e Organizatës për Siguri dhe Bashkëpunim në Europë (OSBE) për Institucionet Demokratike dhe të Drejtat e Njeriut dhe Asamblenë e saj Parlamentare nga vëzhgimi i zgjedhjeve, duke kufizuar transparencën që është thelbësore për zgjedhje të ndershme.

“Këto veprime bien ndesh me detyrimet e Rusisë, përfshirë Konventën Ndërkombëtare për të Drejtat Civile dhe Politike, si dhe angazhimet e saj ndaj OSBE -së dhe organeve të tjera ndërkombëtare dhe rajonale”, thotë SHBA.

Në deklaratën e DASh i bëhet thirrje Rusisë që të respektojë detyrimet e saj ndërkombëtare për të respektuar të drejtat dhe liritë themelore të njeriut dhe t’i japë fund fushatës së saj të presionit ndaj shoqërisë civile, opozitës politike dhe mediave të pavarura.

“Për më tepër, ne nuk e njohim mbajtjen e zgjedhjeve për Dumën Ruse në territorin sovran të Ukrainës dhe riafirmojmë mbështetjen tonë të palëkundur për integritetin territorial dhe sovranitetin e Ukrainës”, mbyllet deklarata e SHBA. SHQIP