Presidenti amerikan, Donald Trump njoftoi sot se kishte zgjedhur një deputet republikan dhe një prej mbështetësve të tij më të besuar, Mark Meadows, si drejtorin e ri të kabinetit, një post i vështirë dhe vendimtar në administratën amerikane.
Meadows do të jetë personi i katërt që e mban këtë post që prej fillimit të presidencës Trump.
“Jam shumë i lumtur të njoftoj se deputeti i Kongresit, Mark Meadows do të bëhet shef kabineti i Shtëpisë së Bardhë”, njoftoi Trump në një mesazh në Twitter.
“E njoh dhe kam punuar me Mark që prej shumë kohësh dhe marrëdhënia jonë ka qenë vërtet e mirë”, shtoi ai.
Mark Meadows, 61 vjeç, është zgjedhur në Dhomën e Përfaqësuesve për Karolinën e Veriut. ATSH
