Tetë persona kanë humbur jetën pas një operacioni ajror të ushtrisë amerikane kundër tre mjeteve lundruese të dyshuara për trafik droge në Paqësorin lindor.
Lajmi është bërë i ditur nga Komanda Jugore e Shteteve të Bashkuara, e cila konfirmoi se objektivat ndodheshin në korridore të njohura të trafikut ndërkombëtar të narkotikëve.
Sipas njoftimit zyrtar të publikuar në platformën X, inteligjenca amerikane ka vërtetuar se anijet ishin të përfshira në aktivitete të trafikut të drogës. Gjatë ndërhyrjes u shkatërruan të tre mjetet, ndërsa u raportuan tetë viktima. Tre persona në anijen e parë, dy në të dytën dhe tre në të tretën.
Sipas të dhënave, gjatë këtij viti janë kryer mbi 20 goditje ushtarake amerikane në Karaibe dhe Paqësor kundër mjeteve të dyshuara për trafik droge, ku kanë humbur jetën rreth 90 persona.
Shtetet e Bashkuara të Amerikës akuzojnë presidentin venezuelian si kreun e trafikut të drogës, gjë e cila mohohet nga Maduro.
Administrata Trump e ka cilësuar këtë angazhim si një “konflikt të armatosur jo-ndërkombëtar” kundër karteleve të drogës, të cilat i konsideron grupe terroriste.
Presidenti Donald Trump ka kërkuar largimin e Maduros, duke e akuzuar atë se po dërgon narkotikë dhe kriminelë drejt SHBA-ve. Maduro nga ana tjetër, sipas Reuters, dyshohet të ketë pranuar largimin e tij në një telefonatë me Trump-in, vetëm në rast se ai dhe familja e tij merrnin amnisti të plotë ligjore, duke përfshirë heqjen e sanksioneve të SHBA-ve dhe përfundimin e një çështjeje në Gjykatën Ndërkombëtare Penale.
