Qeveria siriane po vret të burgosurit e një prej burgjeve të saj dhe po përdor një krematorium për djegien e trupave, tha sot një zyrtar i Departamentit amerikan të Shtetit.
”Të paktën 50 të burgosur janë vrarë çdo ditë në burgun e Sajdnajas, në periferi të Damaskut”, tha Stuart Jones, ndihmëssekretari në detyrë i Zyrës së Departamentit amerikan të Shtetit për Çështjet e Lindjes së Afërme.
”Disa trupa janë varrosur në një varr masiv, por trupat e tjerë janë djegur në krematorium, që ndodhet në godinën e burgut”, theksoi Jones për gazetarët në Uashington.
”Të paktën 70 të burgosur mbahen aktualisht nga regjimi sirian në qeli të ndërtuara për të mbajtur vetëm pesë të tillë”, shtoi ai.
Ky informacion është mbledhur nga disa burime, përfshirë OJQ, njoftime të medias apo burime të shërbimeve sekrete amerikane./b.d
