Shtetet e Bashkuara kanë kërkuar nga Zvicra që të ekstradojë shtatë zyrtarë të organizatës botërore të futbollit FIFA, në kuadrin e një hetimi për korrupsion.
Zyrtarët zviceranë të drejtësisë thanë sot se kanë marrë kërkesat për ekstradimin e shtatë zyrtarëve të FIFA-s të arrestuar në Zyrih në muajin maj nën dyshimet për ryshfet.
Një padi e SHBA lëshuar në muajin maj akuzon nëntë zyrtarë të FIFA-s dhe pesë drejtues korporatash për vepra që përfshijnë shantazh, mashtrim me transferim elektronik fondesh dhe pastrim parash.
Një hetim i veçantë zviceran po shqyrton akuzat për keqmenaxhim dhe pastrim parash të lidhura këto me dhënien e Kupave të Botës Rusisë dhe Katarit, përkatësisht në vitet 2018 dhe 2022.
FIFA ka pezulluar procesin e tenderit për Botërorin 2026 për shkak të këtyre problemeve.
Mikpritësi i Botërorit 2026 ishte vendosur të përzgjidhej nga anëtarët e FIFA-s në vitin 2017 në Malajzi. Por tani nuk është e qartë se kur do të merret vendimi. VOA
