Departamenti amerikan i Thesarit ka përfshirë në listën e zezë 5 shtetas bullgarë si dhe 64 subjekte të lidhura me ata.
Sipas autoriteteve amerikane, personat në fjalë, por edhe disa bashkëpunëtorë të tyre, duke shfrytëzuar postet publike, janë përfshirë në afera të nivelit të lartë.
Bëhet fjalë për Vassil Kroumov Bojkov, një biznesmen dhe oligark i shquar bullgar, Delyan Slavchev Peevski, një ish-anëtar i parlamentit, Ilko Dimitrov Zhelyazkov, ish zëvendës shefi i Agjencisë Shtetërore bullgare për Operacionet Teknike etj.
Si pasojë e këtyre sanksioneve janë bllokuar të gjitha pronat e tyre. Në deklaratë thuhet se korrupsioni degradon sundimin e ligjit, dobëson ekonomitë, minon institucionet demokratike, vazhdon konfliktin dhe privon civilët e pafajshëm nga të drejtat themelore të njeriut.
Pak ditë më parë, SHBA shpalli non-grata edhe Sali Berishën, por ky i fundit u shpreh se amerikanët e kanë personale me të pasi ka kundërshtuar ndryshimin e kufijve të Kosovës. Ish-kryeministri shqiptar u shpreh se s’ka abuzuar kurrë me pushtetin dhe se fëmijët e tij s’kanë marrë një qindarkë nga paratë publike.
/a.r
