Mesfushori shqiptar Xherdan Shaqiri, ka thënë se Stoke City ka çdo mundësi që të kualifikohet në Ligën e Kampionëve këtë sezon. Ekipi i përfaqësuesit të Zvicrës pozicionohet në vendin e nëntë në Premier Ligë dhe deri më tani ka mposhtur ekipe si Manchester Unitedi, Manchester City, Chelsea dhe Evertoni. Humbjet nga West Brom-i, Watford-i, Crystal Palace dhe Sunderlandi kanë ndalur formën e mirë të Stoke, por Shaqiri beson se ekipi i tij është në gjendje që të kualifikohet në garën e famshme evropiane. “Në futboll kurrë nuk i dihet”, ka thënë 24-vjeçari për Daily Star. “Premier Liga sivjet është ndryshe, disa ekipe janë poshtë dhe lartë si puna e Liecester-it [Cityt]. Çdo gjë mund të ndodhë në këtë ligë”.
“Ne duhet të punojmë shumë, të luajmë mirë dhe në fund të sezonit të shohim se ku jemi. Për ne e rëndësishme është që të luajmë si ekip, vetëm kështu mund të fitojmë”, ka shtuar Shaqiri, transmeton Koha.net.
