Emisioni “Tonight” kishte të ftuar personazhe të njohur që kanë tërhequr vëmendje me nismat e tyre. Bëhet fjalë për Albana Osmanin, drejtuesja e nismës “Ti je një luledielli”, dhe Rigerta Lokun, fermeren që aq shumë u komentua pas fjalimit në parlament, ku ajo solli historinë e saj të suksesit dhe problemet e fshatit.
Albana Osmani zbuloi në Tonight Ilva Tare shtysën e saj për të krijuar “Ti je një luledielli”. Sëmundja e kancerit që kishte prekur mamanë e shoqes së saj të ngushtë, e cila u nda nga jeta edhe pas kurës shumë të shtrenjtë që mori, e bëri Albanën të reflektonte dhe të bënte diçka për t’i ardhur në ndihmë këtyre personave. Dhe rezultati është nisma e shkëlqyer “Ti je një luledielli që mbledh fonde për fëmijët e prekur nga kanceri dhe që Albana kërkon ta bëjë ndëkombëtare.
E kam nisur thjeshtë, duke u gjendur me njerëz pranë meje që, ose kishin humbur të shtrenjtët e tyre nga sëmundja e shekullit që është kanceri, ose ishin vetë duke kaluar fazat e procesit të kimioterapisë, pra shumë njerëz të prekur nga kjo sëmundje. Një prej tyre ishte dhe mikesha ime që jam rritur me të, Klara Aliaj, e cila në një periudhë shumë të vështirë të jetës së vet, të ëmën e kishte shtruar dhe po kryente kimioterapinë, nuk kishte më para për të paguar këtë proces që është goxha i shtrenjtë. Klara mori një kredi, pagoi çfarë i duhej për mamanë, mamaja nuk ia doli, ndërroi jetë dhe Klara vazhdoi të paguante kredinë dhe për muaj të tjerë, ajo ishte çdo ditë pranë meje dhe të jem shumë e sinqertë, ishte një ndër njerëzit që mua më frymëzoi dhe po mendoja, çfarë dreqin po bëjmë ne në këtë vendin tonë kur unë kam kaq pranë vetes njerëz të tillë. Çfarë po bëj unë, kam ngritur një profil publik me kaq vite punë dhe me një reputacion që jam përpjekur ta ruaj dhe ta mbroj me jetën time sepse kështu jam edukuar që nga familja mbase dhe kështu do vazhdoj ta ruaj, dhe thashë që duhet të mendoj të bëj diçka për njerëzit, për Klarën në fjalë, shoqen time që e dua shumë por si Klara kishte shumë.
Rrëfimi i Rigertës
Për herë të parë pas fjalimit të saj të famshëm në parlament, fermerja Rigerta Loku, e ftuar në Tonight Ilva Tare ka treguar se si i ka përjetuar reagimet pas atij fjalimi ku disa prej tye ishin edhe të ashpra. Rigerta tha se ai fjalim ishte bërë ekskluzivisht nga vetë ajo dhe askush nuk e kishte ndihmuar dhe nuk ka patur asnjë qëllim tjetër veçse të kthejë vëmendjen e të pranishmëve tek problemet e fshatit
Kam qenë fjaltore, kam sjellë fjalën, kam qenë ambasadore e një fshati, e një vendi, ku ndoshta dhe shumë fshatra dhe vende të tjera kanë parë vetveten, asgjë më tepër. Nuk ka qenë as i përgatitur, as i parapërgatitur, ka qenë diçka spontane që me thënë të drejtën ishte një uragan mediaciteti pastaj për mua sepse të shohësh veten tënde 7 ditë rresht nëpër portale sikur çfarë bëra… Nuk bëra asgjë, thjeshtë kam marrë fshatin dhe e kam vendosur në parlament. Ka patur dhe “VIP-a” që janë marrë me mua… Pse të merren me mua? Kush jam unë që të merren me mua? Të merren me fshatin, fshati është shumë më i madh se sa unë, ta trajtojnë, ta shërojnë në rast se e kanë këtë mundësi. Kush e shkroi fjalimin tim…? E kam patur letërsinë dhjetë.
