Ngrirja e marrëdhënieve të Rusisë me Turqinë, kriza e refugjatëve, afërsia me luftën në Siri dhe frika nga aktet terroriste nga ISIS dhe kurdët, kanë bërë që plazhet turke të humbasin shumë turistë për verën që vjen.
Sipas llogarive, në verën e këtij viti zona e Antalias do të humbasë 90 përqind të turistëve rusë.
Nga kjo mund të përfitojë Shqipëria, edhe pse nuk ka infrastrukturën e kërkuar dhe numrin e hoteleve për përballimin e një fluksi tepër të madh, si ai i rusëve dhe i shtetasve të vendeve ish-sovjetike në rivierën turke.
Në prag të çeljes së sezonit turistik dhe të praktikës së konsoliduar prej disa vitesh, Këshilli i Ministrave ka vendosur heqjen e vizave për shtetasit nga vendet e Arabisë Saudite, Katarit, Omanit, Rusisë, Gjeorgjisë dhe Bjellorusisë, për periudhën 15 maj – 1 nëntor 2016.
Ky vendim është marrë pas propozimit të bërë nga Ministri i Punëve të Jashtme dhe Ministri i Punëve të Brendshme, me sugjerim edhe të Ministrisë së Zhvillimit Ekonomik, Turizmit, Tregtisë dhe Sipërmarrjes, për Çështjet e Turizmit.
Sipas këtij vendimi, shtetasit nga vendet e mësipërme, kanë të drejtë të hyjnë në Republikën e Shqipërisë të pajisur vetëm me pasaportë, pa vizë.
Heqja e vizave për këto shtete bëhet me qëllim tërheqjen e turistëve të huaj për këtë sezon vjetor.
d.i.