Shkëlqim Goxhaj, shef i shërbimit zjarrfikës në Tiranë tha në studion e Report Tv se hedhja e fishekzjarreve në natën e ndërrimit të viteve duhet të administratohet nga institicionet dhe jo nga qytetarët.
Sipas tij, kjo do shmangte ndezjen dhe hedhjen e materialeve piroteknike nga ballkonet e apartamenteve të cilët janë bërë shkak për ngjarje të rënda si zjarret në banesa apo edhe lëndimin e qytetarëve të tjerë.
“Përdorimi i materialeve piroteknike duhe të bëhet nga institucionet. Dje p.sh bashkia ka bërë një organizim shumë të mirë dhe mendoj se në të ardhmen duhet që fishekzjarret të administrohen nga institucionet në raste festash si ndërrimi i viteve. Mbrëmjen e djeshme u hodhën fishekzjarre edhe nga ballkonet çka bëri që në Uazën e Re të merrte flakë ballkoni i një apartamenti dhe u desh ndërhyrja e shërbimit zjarrfikës për vënien e situatës në kontroll“, u shpreh Goxhaj.
Shërbimi zjarrfikës ishte një nga disa profesionet që natën e ndërrimit të viteve nuk e “njohin” si festë për shkak se detyra e tyre është t’u gjenden pranë qytetarëve në momente të vështira, pavarësisht se natën e kaluar nuk ka pasur emergjenca nga zjarret apo për persona të lënduar./ReportTV
