Presidenti amerikan, Donald Trump, uron Serbinë me rastin e ditës së shtetësisë dhe kërkon forcimin e mëtejshëm të partneritetit. Në letrën e dërguar homologut serb, Aleksandër Vuçiç, kreu i Shtëpisë së Bardhë kërkon lidhje më të forta Beograd-Washington për të kontribuar në sigurinë dhe prosperitetin e qytetarëve dhe për investime të ndërsjella në teknologji dhe energji.
Trump vlerëson kontributin e Serbisë në sigurinë ndërkombëtare, me ndihmën e dhënë popullit të Ukrainës kundër agresionit rus apo me misionet paqeruajtëse në botë.
“Përgjatë këtij viti, pres me padurim përpjekjet e përbashkëta për të promovuar stabilitetin dhe zhvillimin ekonomik në Ballkanin Perëndimor. Shtetet e Bashkuara mbështesin plotësisht integrimin e vazhdueshëm të Serbisë në hapësirën euroatlantike, si dhe përpjekjet e saj për të promovuar marrëdhënie paqësore dhe të begata me fqinjët dhe partnerët e saj në rajon”, tha Trump.
Pavarësisht vlerësimit të presidentit amerikan, Serbia gjithnjë e më shumë po zhytet në korrupsion dhe qeverisje të keqe. Këtë e konfirmon dhe raporti i Transparency International.
Serbia ka rënë me një vend krahasuar me vitin e kaluar, sa i përket perceptimit të korrupsionit. Shteti që drejtohet nga Vuçiç ka arritur të marrë vetëm 35 pikë nga 100 dhe renditet në vendin e 105 nga 180 në total, duke u konsideruar si shteti më i korruptuar në rajon.
