Përderisa në Kosovë dështimi për anëtarësim në UNESCO tashmë nuk është pjesë e retorikës së politikanëve, shteti serb është duke e vazhduar nismën globale “NoKosovoUnesco”. Pjesë e këtij aksioni është edhe projekti “Arti mesjetar serb në Kosovë e Metohi”.
Nga dita e 25-të e këtij muaji, për tri ditë, qytetarët e Beogradit do të kenë mundësinë që ta përjetojnë “trashëgiminë serbe në Kosovë e Metohi”. Monumentet e trashëgimisë kulturore të Kosovës do ta mbulojnë Kuvendin e Beogradit nëpërmjet një projeksioni katërdimensional. Me këtë projekt, siç raportojnë mediat serbe, po synohet edhe vëmendja ndërkombëtare.
Për njohësit e fushës së trashëgimisë kulturore në vend ky projekt është vazhdimësi e propagandës së Serbisë kundër Kosovës, e vetë shteti më i ri i Evropës duhet që ta dëshmojë përkushtimin ndaj trashëgimisë kulturore, duke shtuar kujdesin ndaj saj.
“Si kontribut yni në aksionin global ‘NoKosovoUnesco’, duke dëshmuar se tek tash, Serbinë e pret një betejë e fuqishme për ta ruajtur trashëgiminë kulturore të saj, nëpërmjet videos 4D do të shfaqim pasurinë tonë kombëtare në Kosovë e Metohi, prej freskave deri te arkitektura e manastireve dhe e kishave”, shkruhet në njoftimin e kompanisë për art digjital “OHillusions”, e cila realizon projektin “Kulturizacija”.
Projekti “Arti mesjetar serb në Kosovë e Metohi” ndjek monografinë “Trashëgimia botërore e Serbisë”, botuar në janar të vitit 2010 nga Ministria e Kulturës e Serbisë.
