Serbia ka nënshkruar një kontratë rekord me kompaninë izraelite të mbrojtjes “Elbit Systems”, në vlerë prej 1,63 miliardë dollarësh për furnizimin me sisteme të avancuara ushtarake gjatë pesë viteve të ardhshme.
Edhe pse zyrtarisht vendi nuk u bë publik, mediet izraelite si Globes dhe Times of Israel raportojnë se bëhet fjalë për Serbinë.
Marrëveshja përfshin një sërë sistemesh moderne, përfshirë artileri raketore me precizion të lartë dhe dronë të niveleve të ndryshme, nga ata personalë deri tek platformat strategjike pa pilot. Përveç kësaj, Serbia do të pajiset me teknologji të inteligjencës dhe mbikëqyrjes, duke përfshirë sistemet SIGINT, COMINT dhe të luftës elektronike. Paketës i shtohen pajisje elektro-optike, sisteme për shikim natën dhe përmirësime të konsiderueshme për automjetet luftarake.
Një komponent kyç i marrëveshjes është digjitalizimi i plotë i forcave të armatosura serbe përmes zgjidhjeve të komandës dhe kontrollit C4ISR.
Ky është investimi më i madh ushtarak që Serbia ka bërë ndonjëherë me një kompani izraelite dhe ndër më të mëdhenjtë në Evropë. Analistët e mbrojtjes vlerësojnë se kjo kontratë e fuqizon ndjeshëm Serbinë në aspektin teknologjik dhe operativ.
Marrëveshja vjen pas një tjetër kontrate më të vogël në janar 2025, me vlerë 335 milionë dollarë, që po ashtu përfshinte dronë dhe sisteme raketore.
Burime të afërta me Elbit Systems theksojnë se projektet do të realizohen në faza, me dorëzime të vazhdueshme deri në vitin 2030.
