Beteja elektorale për presidentin e ardhshëm të Serbisë dhe përplasjet mes kandidatëve dhe përkrahësve të tyre kanë nisur të nxjerrin në dritë edhe fakte të panjohura për opinionin, ndër të cilat ka edhe që janë me interes për Kosovën.
Kështu, në një intervistë për TV Pink, ministri i Jashtëm i Serbisë, Ivica Daçiçi, përkrahës i kandidatit presidencial, Aleksandar Vuçiç, ka treguar një detaj deri më tani të panjohur nga koha kur president i Serbisë ishte Boris Tadiçi, kryeministër Mirko Cvetkoviçi, ndërsa ministër i Jashtëm, Vuk Jeremiçi, tani njëri nga kundërkandidatët e Vuçiçit për president, raporton agjencia e lajmeve FoNet, shkruan Koha Ditore.
Siç tregoi Daçiçi, i cili asokohe ka qenë ministër i Brendshëm, në kohën para se të shpallej Vendimi i Gjykatës Ndërkombëtare të Drejtësisë rreth ligjshmërisë së shpalljes së Pavarësisë së Kosovës, Serbia ishte zotuar se do ta respektonte dhe pranonte atë vendim – çfarëdo qoftë ai.
Por, sapo Gjykata bëri publik vendimin, Serbia nuk e respektoi fjalën e dhënë, duke shkaktuar kështu një reagim të ashpër ndërkombëtar, para së gjithash nga Gjermania. (b.an)
