Policia e Kosovës ka shoqëruar 10 persona si të dyshuar për sulmin terrorist në kanalin e Ibër-Lepencit, por vetëm një ka dalë para Gjykatës Speciale në Prishtinë.
Të pandehurit Jovan Viqentijeviç iu caktua masa e paraburgimit për 30 ditë. Ka dyshime të forta se ai bashkë me vëllain e tij të kenë kryer disa vepra penale. Pavarësisht se në shtëpinë e tij janë gjetur granata dore, armë e municione, avokati mbrojtës kërkoi lirimin e të dyshuarit.
“Ne besojmë se nuk ka asnjë arsye për të caktuar paraburgim, përveç kësaj, nuk ka prova për krimin për të cilin akuzohet. Ai është përgjegjës për sulmin ndaj rendit kushtetues, shkatërrimin e objekteve infrastrukturore të lidhura me terrorizmin dhe vepër penale mbajtje të paautorizuar të armëve dhe municioneve. I pandehuri ka shpjeguar lëvizjen e tij gjatë asaj kohe kritike që nuk ka të bëjë me vendin ku ka ndodhur shpërthimi. Ekzistenca e municionit është e padiskutueshme, por gjithçka që është gjetur nuk ka lidhje me shpërthimin, nuk janë gjetur eksplozivë, ndezës, detonatorë, kështu që ajo që është gjetur absolutisht nuk e vërteton atë që pretendon prokurori publik”, deklaron avokati Nebojsha Vllajiç i Jovan Viqentijeviç.
Sulmi është konsideruar terrorist edhe nga partnerët ndërkombëtar të Kosovës. Eksperti i procedurës penale, Arbër Jashari, thotë për A2 CNN se hetimi i këtij rasti do të jetë shumë i vështirë.
Plani i një sulmi të përmasave të tilla është shumë i stofistikuar, thekson eksperti i sigurisë, Nuredin Ibishi për A2CCN.
Në mbrëmjen e 29 nëntorit, në fshatin Varagë të komunës së Zubin Potokut, në veri të vendit, u dëmtua kanali i ujit të Ibër-Lepencit përmes një sulmi terrorist. Autoritetet e Kosovës ofruan një zgjidhje provizore duke vendosur një kontejner për të mundësuar furnizimin me ujë për disa qytete dhe Korporatën Energjetike të Kosovës.
