Ministria e Bujqësisë ka marrë sot masën e lejimit të lëvizjes së kafshëve të gjalla të llojit gjedh nga fermat vetëm në drejtim të thertoreve brenda qarkut të origjinës.
Me urdhër të ministrit për marrjen e masave kufizuese për parandalimin dhe kontrollin e sëmundjes së Dermatozës Nodulare të Gjedhit, janë reduktuar masat shtrënguese të bllokimit total të lëvizjes së kafshëve të gjalla të llojeve gjedh, duke lejuar lëvizjen e tyre në drejtim të një thertoreje të përcaktuar brenda qarkut të origjinës së tyre.
“Shërbimi veterinar në drejtoritë e bujqësisë në qarqe do të informojnë fermerët që mbarështojnë gjedh dhe do të kryejë monitorimin e lëvizjes së kafshëve dhe mjeteve të transportit si dhe do të informojë çdo ditë Drejtorinë Veterinare.
Drejtoria Veterinare do bashkëpunojë me Autoritetin Kombëtar të Ushqimit për të bashkërenduar punën edhe me njësitë e qeverisjes vendore për monitorimin e tregjeve të kafshëve dhe thertoreve, shkruan shqip.
Aktualisht Ministria e Bujqësisë, Zhvillimit Rural dhe Administrimit të Ujërave nëpërmjet shërbimit veterinar dhe strukturave të tjera të varësisë, është duke ndjekur vazhdimisht rastet mbi numrin kafshëve të prekura dhe shtrirjen gjeografike të tyre, dhe në kushtet kur vaksinimi i kafshëve të llojit gjedh në të gjithë vendin është kryer në një numër të konsiderueshëm kafshësh dhe po vazhdon me ritme të kënaqshme në të gjithë vendin, sipas situatës që do të paraqitet do të rishikojë mundësinë e reduktimit të mëtejshëm të masave të bllokimit të lëvizjes së kafshëve deri në shfuqizimin e plotë të urdhrit nr 371 datë 08.07.2016”, njofton ministria.
