Vendi vijon të përballet me motin e keq, teksa në Fier, prurjet e lumenjve kryesorë kanë sjellë probleme të konsiderueshme në disa zona.
Akset nacionale dhe rurale janë të kalueshme normalisht, furnizimi me energji elektrike dhe ujë të pijshëm është në rregull, ndërsa hidrovoret janë në gjendje pune dhe gatishmëri të plotë. Megjithatë, prurjet e larta të lumenjve kanë shkaktuar përmbytje në disa zona bujqësore dhe banesa.
Në lumin Vjosa, prurjet janë në kuota të larta, por me tendencë uljeje sipas të dhënave nga ura e Memaliaj. Ujërat e tepërta po tërhiqen drejt Hidrovorit të Darzezës, duke lehtësuar tokat bujqësore të përmbytura.
Ndërkohë, lumi Seman ka dalë nga shtrati në fshatin Murriz, në Njësinë Administrative Fiershegan të Bashkisë Lushnje, duke sjellë prezencë uji në oborret e banesave. Përveç kësaj, qindra hektarë tokë bujqësore janë përmbytur brenda argjinaturave në Roskovec, Patos dhe Fier.
Probleme janë shënuar edhe në lumin Shkumbin, i cili ka dalë nga shtrati në fshatin Thanasaj, duke kaluar nivelin e argjinaturës dhe duke prekur rreth 20 banesa. Strukturat e Bashkisë Lushnje ndodhen në terren dhe po shqyrtojnë mundësinë e evakuimit të banorëve të prekur.
Autoritetet theksojnë se mbeten në kontakt të vazhdueshëm për monitorimin e situatës dhe marrjen e masave të nevojshme, ndërsa u bëjnë apel qytetarëve të tregojnë kujdes dhe të ndjekin udhëzimet e institucioneve përgjegjëse.
***
Bashkia Shkodër ka raportuar mbi gjendjen hidrologjike në territorin e saj, duke theksuar se situata paraqitet e qëndrueshme dhe nën monitorim të vazhdueshëm. Nivelet e ujit janë nën kuotat kritike dhe nuk ka banesa me prezencë uji në brendësi të tyre.
Sipas të dhënave, sipërfaqja totale e tokës bujqësore me prani uji vlerësohet rreth 525 hektarë, ku rreth 110 ha në Njësinë Administrative Dajç, 265 ha në Nj.A. Velipojë dhe 150 ha në Nj.A. Ana e Malit.
Në Obot, uji është prezent në afërsi të oborreve, pa depërtuar në banesa, ndërsa qarkullimi është i garantuar dhe realizohet me mjete të Ushtrisë.
Hidrovoret po punojnë në kapacitet të plotë dhe pa ndërprerje, duke mbajtur nivelet e ujit në kuota të sigurta. Furnizimi me energji elektrike është normal, ndërsa argjinaturat, kanalet kulluese dhe shkarkuesat e Digës së Rezervuarit të Shkodrës nuk paraqesin problematika apo rrezik për përmbytje.
Nivelet e lumenjve
Situata e lumenjve mbetet e kontrolluar:
Në Dajç, niveli i Bunës është 6.58 m.
Në Urën e Vjetër të Bunës, niveli i ujit është 8.50 m, rreth 1 metër nën kuotën kritike prej 9.50 m.
Në Urën e Bahçallëkut, lumi Drin paraqitet në kuotën 8.20 m, rreth 1.80 m nën kuotën kritike prej 10.00 m.
***
Prefekti i qarkut Gjirokastër ka raportuar mbi situatën e akseve rrugore dhe zonave të prekura nga moti i keq. Në disa bashki të qarkut vijojnë problematikat me rrëshqitje dherash, ku për pasojë janë bllokuar rrugët e disa fshatrave, ndërsa po ashtu janë evakuuar edhe disa banorë, banesat e të cilëve rrezikoheshin. Strukturat vendore dhe kontraktorët janë në terren për menaxhimin e situatës.
Bashkia Gjirokastër
Në aksin Gjirokastër–Tepelenë, km 17, vijon puna për përforcimin e argjinaturës së lumit Drino. Rruga e Qafës së Çajupit mbetet e bllokuar, ndërsa kontraktorët po punojnë për hapjen e saj. Në rrugën e Dhoksatit, njësia Lunxhëri, qarkullimi bëhet me fuoriatrada. Në qytetin e Gjirokastrës vazhdon puna për normalizimin e situatës, ndërsa mbi fshatin Mingul është shënuar një rrëshqitje masive kodre që po mbahet në monitorim.
Bashkia Libohovë
Në njësinë administrative Zagori, rrugët hyrëse të fshatrave Zhej, Lliar dhe Topovë vijojnë të jenë të bllokuara për shkak të rrëshqitjeve të dherave. Për ndërhyrje është kërkuar një fadromë me zinxhirë, për shkak të terrenit të vështirë.
Bashkia Memaliaj
Në njësinë Memaliaj (fshat), një rrugë e brendshme mbetet e bllokuar, duke izoluar pesë banesa. Në fshatin Tosk-Martalloz, njësia Luftinjë, rrëshqitja e dherave rrezikon një banesë, ndërsa terreni i vështirë e bën të pamundur ndërhyrjen e mjeteve. Në fshatin Levan, njësia Krahës, rrëshqitjet janë përsëritur edhe pas ndërhyrjes së ekipeve, dhe pritet raporti i specialistëve gjeologë për hapat e mëtejshëm.
Bashkia Dropull
Nuk raportohen problematika.
Bashkia Përmet
Në njësinë Frashër është hapur rruga deri në Kokojkë, duke mundësuar lëvizjen drejt fshatrave Pagri, Borockë, Kreshovë, Soropull dhe Odrican. Në qytetin e Përmetit, dy familje të evakuuara nga lagjia Sede janë rikthyer në banesat e tyre, ndërsa vazhdon puna për pastrimin e dherave.
Bashkia Këlcyrë
Në fshatin Malëshovë, tre banesa ku jetojnë shtatë persona rrezikohen nga rrëshqitjet e dherave. Banorët janë evakuuar dhe strehuar te të afërmit e tyre. Në fshatin Luar, njësia Sukë, rruga është bllokuar nga dherat.
Bashkia Tepelenë
Situata paraqitet përgjithësisht normale. Në fshatin Dhëmblan, rruga kalohet me vështirësi për shkak të inerteve. Në aksin Tepelenë–Gjirokastër, pranë Shkallës së Zezë, vijon pastrimi i rrugës, me qarkullim vetëm në një korsi. OSHEE njofton se furnizimi me energji elektrike në gjithë qarkun është normal.
Lumi Vjosë
Niveli i ujit në Memaliaj është 4.7 metra, ndërsa në Përmet 4 metra.
