Deputeti i LSI-së në Vlorë, Shkëlqim Selami ka ‘thyer’ sërish heshtjen dhe ka reaguar në lidhje me akuzat që rëndojnë ndaj ti për një dënim që nuk e ka vetëdeklaruar në formular dhe pretendimin e PD-së se ai ka qenë i dënuar për trafik qeniesh njerëzore në Itali. Në një prononcim për News 24, Selami ka hedhur poshtë këto akuza, me pretendimin se disponon të gjitha dokumentat nga ana e Ministrisë së Drejtësisë Italiane që vërtetojnë pastërtinë e figurës së tij.
“Nuk e kuptoj nxitimin e prokurorisë, pasi u sqaruam. Megjithatë po ju vë në dispozicion dokumentet e sapo ardhura nga Ministria e Drejtësisë Italiane që vërtetojnë pastërtinë time”, tha për ‘BalkanWeb’ deputeti i LSI-së. Më herët ai theksoi se “llumi që nuk do miratimin e vettingut hedh akuza të tilla”. Sipas deputetit të LSI ai vendim nuk ka lidhje me të dhe dokumenti mund të kontrollohet në KQZ. Ai shton se “në vitet ‘90 ka shkuar disa herë në muaj në Itali për biznes dhe nuk është ndaluar asnjëherë”. Ligjvënësi i majtë pohon se është njohur me dokumentin në fjalë në vitin 2007 kur ishte me pushime në Itali. “Vendimi i gjykatës u pushua sepse ishte i falsifikuar”.
Ndërkohë, sot Prokuroria e Përgjithshme nisi një hetim për deputetin e LSI-së për një dënim që nuk e ka vetëdeklaruar në formular./a.m.
