Sektori i hoteleri-turizmit ka shtuar interesin për investime si gjatë vitit të shkuar, ashtu edhe në fillim të vitit 2025.
Kjo konfirmohet nga niveli i lartë i lartë i kreditimit referuar të dhënave të Bankës së Shqipërisë ku zgjerimi vjetor i këtij portofoli rezultoi me 25% ose 5% më i lartë se norma e shënuar në periudhën paraardhëse.
Gjithashtu, bankat kanë rritur financimin e bizneseve në të gjithë sektorët e ekonomisë, dhe rritja vjetore e portofolit është dyshifrore për kategoritë kryesore.
Përshpejtim të ndjeshëm shënoi edhe kredia për sektorin e industrisë dhe tregtisë me norma të larta rritjeje, përkatësisht me 20% dhe 15.8%.
Ndërkohë, kredia për sektorin e ndërtimit dhe për bujqësinë shënoi një rritje me mesatarisht 16.5% dhe 11.4%.
Këto zhvillime konfirmojnë se kërkesa e lartë për financim vjen nga bizneset e të gjithë sektorëve ekonomikë dhe bankat.
Sipas Bankës Qendrore më e theksuar kjo kërkesë ka qenë për investime të lidhura si me sektorin energjetik apo projekte për energjinë e rinovueshme, ashtu edhe me sektorin e hotelerisë, si dhe me sektorët që lidhen me hallka të tjera të zinxhirit ekonomik dhe që reflektojnë interesin e shtuar për turizëm në vendin tonë.
Po ashtu tendencë në rritje gjatë muajve të fundit ka qenë edhe marrja e huave kryesisht në valutë duke mbizotëruar me tepër në monedhen Euro.
Zgjerimi i kredisë në valutë ka shfaqur një zgjerim tre herë më të fortë, nënvizon Banka e Shqipërisë, ndikuar edhe nga ulja e kostos së kredisë në Euro, në përgjigje të zhvillimeve në tregjet ndërkombëtare.
Ky zgjerim i kredisë është mbështetur nga lehtësimi i kushteve të kreditimit dhe lehtësimi i politikës monetare nga Banka Qendrore.
