Atletja e njohur shqiptare, Luiza Gega ka rrëfyer se është munduar disa herë të heqë dorë nga sporti, por për të ka qenë thuajse e pamundur. Në emisionin e mëngjesit “Ditë e Re” në Rtv Ora, ajo ka folur edhe mbi jetën e një sportistje, për vullnetin, ushqimin dhe trajnimin. Gega thotë se bën rreth 150 kilometra në javë, duke theksuar se dieta e saj ditore nuk korespondon në mënyrë të drejtë me djegien e kalorive.
“Kam menduar shpesh për të hequr dorë. Por, është bërë një pjesë e jetës. Kam frikë që do të heq dorë një herë në jetë. Unë zgjohem me të. Gjithë 24 orëshi im është i lidhur me të. Është regjimi që unë mbaj. Duhet të ha në orarin e duhur. Nuk kam ndonjë ushqim specifik. Duhet të mundohem të marr ato proteinat e duhura, karbohidratet e duhura. Kur më shkon mendja edhe ha pica. Unë e kam këtë luksin. Fiziku im për fat të mirë ma lejon, me kuptimin që unë bëj shumë stërvitje dhe e djeg. Unë bëj rreth 150 kilometra në javë. Aktualisht ushqimi është një faktor i rëndësishëm për mua, por unë nuk ushqehem aq sa duhet. Por konsumoj shumë dhe i menaxhoj gjatë ditës, ku mundohem t’i heq me stërvitje. Nuk kam limite në dietë. Mund të pi edhe birrë. Në fakt mua më bën mirë birra, por që unë nuk e pi dot, nuk më pëlqen”, tha ajo.
Sakaq, ajo ka folur edhe për jetën seksuale, gjatë periudhës që është e angazhuar në gara.
Meshkujt nuk bëjnë seks 24 orë para ndeshjes, por femrat kanë ndalime?
“Meshkujve nuk i bën mirë para garave, por femrave mund t’i bëj edhe mirë”, ka treguar Luiza.
