Zhvillimi i tregut sekondar, përveç atij primar të investimeve është një ndër objektivat e Bankës Qendrore. Guvernatori i Bankës së Shqipërisë, Gent Sejko deklaroi të martën se zhvillimi i këtij tregu lidhet me zhvillimet në të ardhmen për ringritjen e aktivitetit të një burse.
Një ditë më parë ministri i financave Arben Ahmetaj, para deputetëve të Komisionit i kërkoi se Bankës së Shqipërisë të kalojë në tregun sekondar, duke mos qenë më një aktor vetëm në tregun primar.
“Së bashku me Qendrën për Zhvillim Ndërkombëtar të Harvardit jemi duke punuar për të zgjeruar tregun sekondar. Duam që Banka e Shqipërisë të kalojë në tregun sekondar. Të mos jetë një aktor i drejtpërdrejt siç është sot në tregun primar, po të kalojë në tregun sekondar”, u shpreh Ahmetaj.
Ndërsa sot, Guvernatori Sejko teksa jepte opinionin e Bankës së Shqipërisë për projektbuxhetin 2017, tha se ne si Bankë Qendrore përpiqemi me instrumentat tona që të stimulojmë bankat e nivelit ë dytë të jenë sa më aktive. Sipas tij, tregu sekondar është hapësirë pozitive, por do të kërkojë kohën e vet dhe masat e saj.
“E kam theksuar shumë herë që ka shumë rëndësi formalizimi. Sa më shumë formalizim aq më shumë ecën çdo inisiativë që ne marrim, reforme, studimi. Asnjë inisiativë nuk do të kishte rezultat do të kthehej në aktivitet spekulativ në qoftëse nuk ulim informalitetin. Duke ulur informalitetin kemi rezultat edhe në inisiativat, qoftë për ringritjen e bursës ashtu edhe për zhvillimin e tregut sekondar”, deklaroi Sejko.
Programi me FMN do të vendoset nga qeveria e ardhshme
I pyetur mbi marrëdhënien e qeverisë shqiptare me FMN-në, nga deputeti i LSI-së në Komision Përparim Spahiu, Sejko tha se marrëveshja me FMN-në mbaron në shkur të këtij viti dhe do të rishikohet pas zgjedhjeve.
Sejko tha se është shprehur qartë nga përfaqësuesi i FMN-së dhe nga misioni në Sshqipëri se programi përfundon në shkurt dhe do të rishikohet pas zgjedhjeve
Edhe vet FMN do të donte të kishte një marrëveshje më të qartë pas zgjedhjeve pasi nuk do të kishte sens të bënte një marrëveshje duke qenë se janë zgjedhjet elektorale në qershor.
Po ashtu Sejko tha se është e drejtë e qeverisë që do të dalë pas zgjedhjeve të 2017 për të bërë një marrëveshje me FMN. “Nuk është çështja që po largohet FMN”, tha Sejko./a.m.
