Në fiks 17 vepra të ndryshme, letrare e publicistike, Bajram Sefaj, ka rënë pre e pasionit të tij duke u munduar ta gjejë veten mes shkrimtarit e gazetarit. Të martën, ai ka folur pak. Për të dhe krijimtarinë e tij kanë folur kolegët në atë që është quajtur “Takim Bajram me Sefajn”, organizuar nga Klubi i Shkrimtarëve të Kosovës, në Institutin Albanologjik të Prishtinës.
Shkrimtari Ibrahim Kadriu ka thënë se Sefaj tërë jetën ia ka kushtuar pasionit të tij, shkrimit. Ai e cilësoi si njeri modest, i cili asnjëherë nuk ndahet i kënaqur me punën e tij dhe gjithmonë kërkon më shumë. “Tërë jetën ia ka kushtuar këtij pasioni duke u munduar të gjejë nëse më shumë është shkrimtar apo gazetar dhe shumë shpesh duke qenë i armik i vetes, pikërisht vetes nuk ia ka pranuar se i takon të dy profesioneve. Pavarësisht se nuk ia pranon vetes, unë në këtë aspekt e shoh të suksesshëm”, ka thënë Kadriu. Ai po ashtu ka thënë se artit nuk i duhet vetëkënaqësia, shkruan “Koha Ditore”.
