Ditën e sotme në Gjykatën Kushtetuese po mbahet seanca për shqyrtimin e shkarkimit të Erion Veliajt si kryebashkiak i Tiranës dhe për shqyrtimin e dekretit të Presidentit Bajram Begaj për zgjedhjet në këtë Bashki.
I pranishëm në këtë seancë gjyqësore është edhe vetë Erion Veliaj, i cili do të lërë për disa orë qelinë e paraburgimit të Durrësit.
Ndërkohë Përfaqësues të Presidencës kërkuan në Gjykatë anulim të vendimit për shfuqizimin e dekretit që anulon zgjedhjet në Tiranë.
Nga ana tjetër, anëtarët e Gjykatës Kushtetuese janë tërhequr për vendim, pas kërkesës së Presidencës.
“Kemi kërkuar që të merret në shqyrtim kërkesa për shfuqizim të dekretit dhe të deklaronit moskompetencën. Zgjedhjet në Tiranë u penguan dhe duhet të kthehet kushtetueshmëria e dekretit. Ne po ju paraqesim kërkesën, që të anuloni shfuqizim e dekretit 350, si hap që duhet t’i paraprijë kësaj kërkese”, tha përfaqësuesja e Presidencës.
