Seanca e fundit plenare për këtë sesion parlamentar ka nisur me përplasje dhe akuza të ndërsjellta
mes grupeve parlamentare duke detyruar kështu edhe Kryetarin Ilir Meta të thërrasë një mbledhje
të konferencës së kryetarëve. Shkak është bërë kërkesa e 10 deputetëve të Partisë Socialiste që
propozuan të futej në rendin e ditës edhe Ligji i ri për Turizmin.
Por kjo kërkesë është kundërshtuar nga opozita e cila tha se ligji ende nuk është miratuar në
Komisionin përgjegjës të Veprimtarive Prodhuese.
Për kreun e grupit parlamentar socialist Gramoz Ruçi ky është një ligj që ka kohë që është miratuar
në komisione dhe se duhet të futet në seancë pasi në çdo procedurë është zbatuar rregullorja por
deputetët demokratë nuk lëvizën nga qëndrimi i tyre për të mos e futur ligjin në seancë me
pretendimin se nuk kanë pasur asnjë njoftim për kalimin e ligjit në komisione dhe se ishin të
papërgatitur për të folur sot për të.
Në këto kushte, Meta shtyu seancën për disa minuta ndërkohë që mblodhi Konferencën e Kryetarëve.
