Në seancën e fundit të legjislaturës së dhjetë të Kuvendit të Shqipërisë, e cila u mbajt ditën e sotme, është miratuar akti normativ për buxhetin e vitit 2025.
Projektligjet u votuan nga deputetët e mazhorancës, ndërsa ata të opozitës e kanë braktisur seancën plenare.
Akti normativ për ndryshime dhe shtesa në buxhet për vitin 2025 është miratuar me 71 vota pro. Po ashtu u votua nga mazhoranca edhe projektligji për strategjinë kombëtare ndaj ndërhyrjeve të huaja dhe dezinformimit.
Projektligji për strategjinë kombëtare ndaj ndërhyrjeve të huaja dhe dezinformimit lidhet me masat konkrete ligjore dhe institucionale për të adresuar dezinformimin dhe ndërhyrjet e huaja keqdashëse ndaj vendit tonë.
Projektligji synon që edhe proceset zgjedhore, edhe demokracia, të mos cenohen nga vende të jashtme keqdashëse ndaj Shqipërisë.
