Kryeministri Edi Rama ka folur në emisionin Porta a Porta në televizionin Rai Uno për Kristi Reçin, të fejuarën e djalit të tij Greg Rama, e cila bashkë me familjen e saj humbën jetën nga tërmeti tragjik i 26 Nëntorit. Teksa u ngushëllua nga gazetari Bruno Vespa për këtë humbje, Rama tha se nuk ka dashur të flasë për këtë gjë sepse tërmeti nuk ka prekur vetëm atë dhe familjen e tij por të gjithë vendin.
“Kam detyrimin të bëj kryeministrin e një vendi që vuan tragjedinë, ndaj nuk doja të flisja për këtë ngjarje sepse nuk është diçka që më përket vetëm mua dhe familjes sime, por i përket të gjithëve. Kjo humbje vetëm sa e shtoi detyrimin tim për të bërë gjithçka, sepse nuk shoh ndryshim nga gjithë të tjerët që humbën jetën”, thotë Rama.
Kristi Reçi, studente në Fakultetin e Mjekësisë, u shua bashkë me familjen e saj pas tërmetit të 26 Nëntor. Nga rrënojat e pallatit ku ata jetonin u nxorën të pajetë babai i saj Eduard Reçi, nëna Dolora Reçi dhe vëllai Klaus Reçi.
Më tej Rama thotë se shpreson që Evropa nuk do ta lërë vetëm Shqipërinë pas tërmetit tragjik që solli dëmtime të shumta të ndërtesave.
Më tej ai tha se i kishte bërë thirrje edhe vendeve të NATO-së.
“Nëse është e vërtetë ajo thënia që ajo që nuk të vret të bën më të fortë, ne duam ta bëjmë një fakt të dukshëm. Ne jemi duke punuar në rrafshin e rindërtimit edhe në lidhje me të bukurën. Unë vij nga samiti i NATO-s, ku i bëra thirrje të gjitha vendeve që të japin një kontribut të gjitha vendeve që të organizoj edhe një konferencë të donatorëve. Shpresoj që Evropa nuk do të na lërë vetëm. Shpresoj që politikanët të kenë të një njëjtën dëshirë si të zjarrfikësve tuaj. Nga ana e qeverisë italiane, tek kryeministri gjeta një person të cilin si politikan mund ta kish gjykuar por si njeri është me zemër të madhe”, tha kryeministri.
Rama theksoi gjithashtu se synohet ndërtimi i lagjeve të reja por jo lagje për të varfrit.
“Kemi edhe disa ndërtesa që janë një kombinim mes lejeve abuzive. kemi disa arkitektë italianë dhe dëshirojmë të ndërtojmë një lagje te re të madhe në Durrës dhe një ose dy në Tiranë. Por jo shtëpi për të varfrit pasi ato mund të shndërrohen në geto”, u shpreh ai.
g.kosovari
