Biznesmeni Gramoz Mema është ekzekutuar me armë zjarri me silenciator pranë zonës së njohur si lagjia e Tepelenasve” në Ksamil. Ngjarja e rëndë ka ndodhur një natë më parë rreth orës 21:45, në Ksamil, por është raportuar më shumë se një orë me vonesë, pasi akush nuk ka dëgjuar të shtëna. Katër persona i zunë pritës Memës, e qëlluan me armë zjarri e më pas u larguan duke e lënë biznesmenin të shtrirë në rrugë.
Me plagë të shumta në trup, Mema është dërguar për në spitalin e Sarandës, por rrugës ka humbur jetën si pasojë e humbjes së gjakut. Vetë fqinjët e Memës kanë rrëfyer se biznesmeni ishte një njeri i qetë dhe nuk njihej si problematic në zonë.
Ai kishte një lokal me qira në qendër të Ksamilit dhe ishte i përfshirë në lojërat e jashtëligjshme të fatit. Paraprakisht dyshohet se vrasja ka ardhur si pasojë e konflikteve në lidhje me ‘bizneset e errëta’ ku ishte përfshirë Mema. Nuk përjashtohet as pista e një konflikti të hershëm që mund të ketë pasur viktima për arsye të tjera.
Gramoz Mema jetonte me nënën e tij në Ksamil dhe nuk ishte i martuar. Ai ishte me origjinë nga Tepelena, kishte jetuar në Greqi dhe prej disa vitesh ishte kthyer në Shqipëri duke u jetuar në Ksamil e Tiranë.
Fqinjët kanë deklaruar se në momentin e ngjarjes nuk janë dëgjuar të shtëna por vetëm ulërimat e nënës.
Burime nga grupi hetimor bëjnë me dije se dyshohet që ngjarja pranë banesës së viktimës të ketë ndodhur për larje hesapesh.
Kjo është edhe pista kryesore ku është fokusuar policia. Besohet se katër persona kanë qëlluar në drejtim të Memajt. Ndërkaq, arma e përdorur në krim dyshohet e tipit pistoletë.
g.kosovari
