Pothuajse 40 për qind e të rriturve në mbarë botën kanë qenë të diskriminuar si fëmijë për shkak të gjinisë së tyre, përkatësisë së tyre etnike ose fetare, aftësisë së kufizuar apo thjesht për shkak të vendbanimit në tyre, është ardhur në përfundim pas një sondazhi të ri të realizuar nga Save the Children në 18 vende te botës mbi çështjet e diskriminimit.
Save the Children në Kosovë është gjithashtu pjesë e kësaj fushate globale, dhe në Kosovë qëllimi do të jetë që fëmijët me aftësi të kufizuara të kenë qasje në shërbimet themelore cilësore dhe gjithëpërfshirëse.
“Hulumtimi i Save the Children tregon që fëmijët me aftësi të kufizuara janë ndër grupet që janë disproporcionalisht më të pafavorizuarit në botë.
Ata kanë tre deri në katër herë më tepër gjasa të përjetojnë dhunë fizike, seksuale ose neglizhim sesa bashkëmoshatarët e tyre pa aftësi të kufizuara,” thotë Ahmet Kryeziu, drejtor i Save the Children në Kosovë.
“Është vlerësuar se rreth 150.000 njerëz në Kosovë kanë një lloj të aftësisë së kufizuar, dhe rreth gjysma mendohet të jenë fëmijë të moshës shkollore, duke hasur në mungesë të profesionistëve të trajnuar mirë dhe alokim të pamjaftueshëm të burimeve shtetërore.
Megjithëse disa hapa janë ndërmarrë në kornizat ligjore që sigurojnë pjesëmarrjen e plotë të fëmijëve me aftësi të kufizuar, si dhe rreth ndërgjegjësimit mbi aftësinë e kufizuar, ende ka boshllëqe të mëdha në politikat dhe programet e aftësisë së kufizuar në adresimin e nevojave të tyre, si dhe në sigurimin e gjithëpërfshirjes dhe qasjes cilësore të barabartë në shërbime.
Përafërsisht, vetëm 10% e fëmijëve me aftësi të kufizuara përfitojnë nga shërbime cilësore duke përfshirë arsimin, shëndetësinë dhe shërbimet sociale”, thuhet në komunikatë.
