Saranda një nga qendrat turistike më atraktive në jug të Shqipërisë, për turistët e vizitorët e shumtë vijon të vizitohet nga jahtet luksoze edhe gjatë muajit shtator.
Porti i Sarandës bën të ditur se “gjatë ditëve të shtatorit janë të shumtë jahtet luksoze që vizitojnë Sarandën”.
Sipas portit, në periudhën janar – gusht 2019 Sarandën e vizituan 1255 jahte turistike, si dhe 215 tragete turistike nga këto 31 tragete Cruises”.
“Për të njëjtën periudhë për vitin 2018 dhe 2019 kemi një rritje të konsiderueshme si në numrin e anijeve turistike (+85 anije turistike për 2019) dhe në numrin e jahteve (+178 jahte)”, thekson porti.
I përkufizuar si “Qyteti i bardhë”, ai është i rrethuar nga kodra dhe përballë tij ndodhet ishulli grek i Korfuzit. Përveç diellit e plazhit, Saranda njihet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit nxit kureshtjen e turistëve të shumtë me historinë e tij mijëravjeçare.
