Nga Skënder Minxhozi/
U bë e disata herë gjatë vitit të fundit që në media filtrojnë lajme rreth arrestimeve të afërta të të dyshuarve të vrasjes tragjike të bankierit Artan Santo. Gjatë 14 muajve të fundit në media kanë dalë shumë pista hetimi, supozime dhe persona të dyshuar si autorë të vrasjes. Nuk ka megjithatë asnjë pistë të besueshme, për ata që e urdhëruan eleminimin e bankierit Artan Santo. Në këtë mjegull misterioze që rrethon ngjarjen, e cila e rrit edhe më shumë sensibilitetin e opinionit publik ndaj çdo hamendjeje apo supozimi konkret, çdo fjalë e organeve të rendit ka efektin e një krisme arme në mes të një koncerti.
Sot mësuam se policia ka mbledhur orë të tëra përgjimesh telefonike e ambjentale, se ka kryer veprime identifikimi dhe gjurmimi për persona të caktuar, që dyshohen si vrasësit e Artan Santos. Deri këtu nuk ka asgjë të keqe. Gjithçka e mësipërme është pjesë e punës së policisë dhe shqiptarët presin me padurime që kjo vrasje makabër në mes të Tiranës, të marrë një autorësi, e me shpresë, edhe dënimin e duhur të autorëve të saj.
Por të thuash sot, në fillim të gushtit, se në shtator do të ketë arrestime të autorëve të mundshëm të vrasjes është, pa ngritur asnjë akuzë ndaj askujt, një gjë totalisht e pakuptimtë dhe joprofesionale. Gjëja më banale që mund të ndodhë në epokën e lajmit global, është që personi apo personat e dyshuar, ende në liri, të tentojnë të largohen që të mos i gjejë shtatori këtu. Shtyrja e hetimeve për Santon nuk ka pse të kthehet në stres për policinë e shtetit dhe organet e tjera të hetimit.
Në ngjarje tejet delikate dhe të komplikuara si kjo, vlen më shumë heshtja dhe vetëpërmbajtja, sesa spektakli me njoftime për arrestime që do ndodhin pas një muaji! Të paralajmërosh vrasësit një muaj para se t’i arrestosh, është mungesë totale logjike, edhe për një fëmijë shkolle, e jo më për organe të specializuara që merren me parandalimin dhe luftën ndaj krimit.
