Kreu i Gjykatës së Krimeve të Rënda Sandër Simoni ka shprehur rezervat e tij për draftin e Reformës në Drejtësi, ku ka thënë se ekspertët janë kundër shkrirjes së Gjykatës së Krimeve të Rënda, me pretendimin se kjo krijon pasiguri tek gjyqtarët aktual.
Këtë deklaratë ai e ka bërë gjatë analizës së punës së këtij institucioni në vitin 2015 ku ka shtuar se, kësaj gjykate duhet ti shtohen kompetencat raporton Shqiptarja.com.
“Kemi ankesat tona në lidhje me draftin që prek Gjykatën e Krimeve të Rënda. Pse duhet të shkrihen krimet kur mund të shtohen kompetencat. A mund të zgjidhet kjo pa shkrirë krimet? Unë mendoj se, si e formuluar drafti krijon pasiguri tek gjyqtarët aktual. Këta gjyqtarë kanë gjykuar grupe e organizata kriminale, ata ndjehen të pasigurt nëqoftëse shkrihet Gjykata” ka thënë Simoni.
Në të njëjtën linjë me kreun e Gjykatës së Krimeve të Rënda ka qenë edhe Fehmi Petku kreu i Gjykatës së Apelit për Krimet e Rënda. Ku ka shtuar se komandimi i gjyqtarëve krijon pasiguri tek ata.
“Shkrirja e kësaj gjykate është e padrejtë. Gjyqtarët e kësaj gjykate duhet të trajtohen me përparësi, duke na komanduar të gjykojmë nëpër rrethe ne na cënohet siguria. Udhëtojmë me automjete që fiken 7 herë në rrugë nga Tirana-Gjirokastër, kjo e papërshtatshme për gjyqtarët e krimeve që kanë status të veçantë sigurie” ka thënë ai.
