Kryeministri Edi Rama në fjalën e tij në ditën e dytë të Forumit të Investimeve BE-Ballkani Perëndimor ka deklaruar se zyrat e qeverisë do të jenë të hapura për novatorët me qëllim shfrytëzimin e të dhënave e statistikave e njohjes nga afër me problematikat.
“Kemi rënë dakord brenda nesh të çojmë përpara procesin duke hapur dyert e qeverisë për të gjithë inovatorët dhe duke krijuar një hapësirë të përbashkët me bërthamë agjencinë e ekselencës që ne kemi krijuar para pak kohe dhe të cilën do e vëmë në dispozicionin tuaj dhe gjithë inovatorëve.
Duam që startupet, inovatorët të aksesojnë institucionet, të kenë mundësi të shohin nga afër problematikat dhe të shfrytëzojnë të dhënat e tyre, statistikat e tyre, brumin që më pas është baza e zgjidhjeve përmes AI dhe krijimit të modeleve të AI”, deklaroi Rama.
Kryeministri u ndal më tej te sfida për krijimin e një akseleratori që do të jetë në mbështetje të ministres virtuale “Diella” duke u bazuar pikërisht në kapitalin njerëzor të AKSHI-t apo agjencisë së ekselencës.
“Duke bërë këtë, besoj se do mësojmë shumë gjëra të reja dhe do prodhojmë produkte të reja. Do mundohemi që çdonjërit nga institucionet qendrore, ti zgjerojmë trurin me AI.
161 ide të paraqitura, është bërë seleksionim paraprak, do vazhdojë garë tjetër”, tha Rama.
Më tej, kryeministri bëri me dije se së shpejti do të organizohet sesioni i parë i Kuvendit, i cili do të mblidhet një herë në 4 muaj me krijuesit novatorë, startup-et, sipërmarrësit, investitorët etj.
“Mezi pres që ministrja të organizojë sesionin e parë të Kuvendit që do ngremë me ju dhe ta mbledhim 1 herë në 4 muaj për të diskutuar për çfarë po bëjmë, çfarë mund të bëjmë dhe për të analizuar dhe ëndërruar së bashku”, tha ai.
