Gjendja shëndetësore e kryetarit të dënuar të komunës së Skenderajt, Sami Lushtaku, me sa duket është përkeqësuar edhe më tej si pasojë e grevës së urisë në të cilën ka hyrë tash e nëntë ditë. Siç mëson Koha.net, Lushtakut i është lejuar shtrimi dhe trajtimi në QKUK nga burgu i sigurisë së lartë në Dyz. Qëndrimi i tij, megjithatë, do të zgjas vetëm deri të hënën, bëjnë të ditura burime të Koha.net.
Lajmin për transferimin e tij në QKUK e ka konfirmuar për Koha.net edhe avokati i tij, Arianit Koci, i cili ka thënë se arsyeja përse Lushtaku është pranuar në Qendrën Spitalore është se “gjendja e tij shëndetësore është mjaftë e rëndë”.
Lushtaku, i cili ishte ankuar për trajtim jo të mirë në QKUK, më 14 janar kishte hyrë në grevë urie. Në shenjë solidarizimi, e tërë komuna e Skenderajt kishte pezulluar shërbimet ndaj qytetarëve për një ditë tërë, kurse ajo e Vushtrrisë kishte pezulluar punën për gjysmë ore. Misioni ndërkombëtar i EULEX-it nuk i ka besuar diagnozës së mjekëve të QKUK-së për shëndetin e kryetarit të Skënderajt, Sami Lushtaku, ka raportuar “Koha Ditore”.
